ПсихоФит: Мотивација – Недостаток и губење на истата!

ПсихоФит: Мотивација – Недостаток и губење на истата!

Без разлика на годините и искуството вложени во бодибилдингот, многу често се случува бодибилдерот да се соочи со недостаток или губиток на мотивацијата. Ако никогаш не сте се нашле во ваква ситуација од една страна Ви честитам што се наоѓате во малцинството, а од друга страна очекувајте недостатокот на мотивацијата да се јави кога- тогаш. Всушност, постои еден интересен факт во однос на мотивацијата во бодибилдингот, а тоа е дека соочувањето со недостатокот од мотивација е тоа што ги поврзува почетниците во овој спорт и професионалците (натпреварувачите). Силната мотивираност е она што ги одржува луѓето посветени, константни и дисциплинирани во секој спорт. Од ден за ден, од година во година. Постојат два типа на мотивација:

  1. Интринзична мотивација (внатрешна)– Тоа е позитивно чувство на задоволство и имплицира вистинско уживање и љубов спрема тренингот (најголемо е чувството на задоволство после завршениот тренинг).
  2. Екстринзична мотивација (надворешна)- Ангажирање и тренирање за да се добие некоја награда, во овој случај и мускулесто, силно, масивно и дефинирано тело (кое би предизвикало и пофалби од страна на другите луѓе). Овој тип на мотивација не вклучува уживање и задоволство спрема процесот кој не води до резултатите односно целта.

Бодибилдерите кај кои постои висока интринзична мотивација подолго време успеваат да одржат континуитет и да ја задржат мотивацијата за разлика од оние кои ја немаат. Овие “тренингохолици” доживуваат чувство на лична исполнетост и задоволство поради својата цел, а не поради очекувањата на другите. Зошто мотивацијата опаѓа односно се намалува?  Ова е процес кој се среќава кај почетниците но и кај професионалците. Најчесто се случува мотивацијата да се намали во почетокот, а тоа се јавува поради нејасно дефинирана цел или преголеми очекувања од себе си. Втора причина поради која може да се јави намалување на мотивацијата е неправилна исхрана. Најчесто се случува поради помала информираност да се игнорира улогата на исхраната во процесот, па за предвиденото време да не се добијат очекуваните резултати и да следи разочарување. Следно е неправилен распоред, што исто така може да биде клучна причина и за неуспех. Неправилниот распоред значи изговор што си го даваме самите на себе си за тренингот да го замениме со кафе со пријателите  или со удобен кревет и омилената серија. Сите овие причини не ретко се јавуваат заедно и сите тие предизвикуваат чувство на разочараност од себе си, помала самодоверба и анксиозност.

Што можете да превземете?

  1. Потсетете се зошто сте почнале. Нека ве води позитивното чувство и ентузијазмот како и првиот ден кога влеговте во теретаната. Разговарајте со луѓето кои имале клучна улога во тој период и кои биле дел од вашата мотивација. Визуелизирајте си ја вашата цел и резултатот кој сакате да го постигнете, а ако е потребно разгледајте ги старите слики и уважете го вашиот напредок и успех од изминатиот период.
  2. Бидете водени од целта. За да бидеме сигурни дека ќе ја постигнеме целта, мора да бидеме сигурни дека таа е доволно специфична и дека има одреден рок. Затоа интересна техника е водење на дневник или фаќање на детални белешки после тренингот. Запишете ја вашата цел и дадете си реален рок до кога сакате да ја постигнете. Потоа внесувајте белешки за тренинзите (пр. колку серии, колку повторувања,тежина, ден за одмор, исхрана), затоа што тоа ќе ви помогне да имате увид во вашиот прогрес или во грешките кои ги правите.
  3. Направете ревизија на целта. Сменете ја вашата цел, направете помали краткорочни цели за кои ќе бидете сигурни дека ќе ги постигнете и направете распоред. Секое утро или еднаш неделно разгледајте ја дневната активност и потсетете се зошто ова ви е важно на вас. Воедно ова е техника која помага полесно да се организира времето и со која ќе ја намалите шансата да го прескокнете тренингот.
  4. Сменете ја теретаната. Ова е техника која ја користат не само бодибилдерите туку и многу спортисти. Менувањето на теретаната, значи менување на средината, опкружувањето и луѓето на кои што сме навикнати, а тоа може да претставува голем предизвик и одличен мотиватор.
  5. Најдете партнер. Помала е веројатноста мотивацијата да се намали ако тренираме со партнер. Тогаш владее принципот I go – you go, кој е многу ефикасен за мотивацијата.
  6. Најдете личен тренер. Улогата на личниот тренер е значајна особено кај оние луѓе кои немаат интринзична мотивација. Во соработка со добар и искусен личен тренер помала е веројатноста да дојде до намалување на мотивацијата затоа што тој знае како да ги организира тренинзите, да бидат интересни и да не бидат досадни. Со стручно подготвена програма тој ќе успее да ве држи фокусирани на вашата цел и најважно, константно ќе ве потсетува зошто го започнавте ова.